ඩොලර් බිලියන 41ක විදෙස් ණය තමන්ට සොච්චමක් බවත් එය ගෙවීම සරල කාරණයක් බවත් වේදිකාවල පුරසාරම් දෙඩූ අනුර කුමාර, බලයට පත්වීමෙන් පසු 2025 අවසන් වන විට මෙරට සමස්ත ණය බර රුපියල් බිලියන 29,994 ඉක්මවා යද්දී කිසිදු විසඳුමක් නොමැතිව අසරණ වීම සහ 'වැරැද්දක් කළොත් පහුවදාම එළියේ' කී මන්ත්‍රීවරුන් වැරදි කරද්දී ආරක්ෂා කිරීම.

වයස 70ට වැඩි හෝ දූෂණ චෝදනා ඇති පුද්ගලයන්ට නාමයෝජනා නොදෙන බවට වේදිකාවල ගිගුරුම් දුන් ජවිපෙ නායකයින්, අල්ලස් කොමිසම මගින් අධිචෝදනා ගොනු කර ඇති කුමාර ජයකොඩිට බලශක්ති අමාත්‍ය ධුරය ලබාදී සිවිල් සංවිධාන ඉල්ලා අස්වන ලෙස බලකරද්දීත් ඔහුව ආරක්ෂා කිරීම සහ ගල් අඟුරු වංචාවලදී පෙර කී වගවීම් අමතක කර දැමීම.

තමන් ගෙයින් ගෙට ගොස් මහින්ද රාජපක්ෂව ජනාධිපති පුටුවේ වාඩි කළ බව සුනිල් හඳුන්නෙත්ති ප්‍රසිද්ධියේ පිළිගැනීම, 'මහින්ද චින්තනය හොඳයි' යැයි කියමින් වෙනස්කම් කිරීමට තවත් අවුරුදු 15-20ක් බලයේ සිටිය යුතු බවට දත්ත ධර්මවර්ධන ප්‍රකාශ කිරීම හරහා ජනතාව ඉදිරියේ මොවුන්ගේ අතීත සහ වර්තමාන දේශපාලන නිරුවත හෙළිදරව් වීම.

රාජ්‍ය වාහන වෙන්දේසි කර මුදල් සොයන බව පවසා පසුව එම වාහන සුඛෝපභෝගී නොවන බැවින් අලුතින් වාහන මිලදී ගැනීමට සිදුවන බව පැවසීම, ජනාධිපති ලේකම් කාර්යාලයේ රුපියල් මිලියන 500ක් වටිනා වාහන මිලියන 200කට මාලිමා හිතවතුන්ට විකිණීම පිළිබඳ සීඅයිඩී පරීක්ෂණ යටපත් කිරීම සහ තරුණයින්ට ජපන් බයික් දෙන බවට දුන් මුසාවාදී පොරොන්දු.

උගන්ඩාවේ සඟවා ඇතැයි කී ධනය මෙරටට ගෙන ආ හැක්කේ තමන්ට පමණක් යැයි වේදිකා දෙවනත් කරමින් ජනතාව නොමග යැවීම, ලොකු වාහනවලින් බැස අව් කණ්ණාඩි දමන සියලු දෙනා 'කම්බ හොරු' ලෙස හංවඩු ගසමින් අද තමන්ගේම මැති ඇමතිවරුන් සුපිරි වාහනවලින් යද්දී එම කතා සබන් බෝල බවට පත්වීම.

ත්‍රිකුණාමලයේ තෙල් ටැංකි 99ක් වැඩි නිසා ඉන්දියාවට දෙන බවට ප්‍රකාශ කිරීම, 'අතිගරු' නාම යොදන්නේ ජනතාව නිවට කිරීමට යැයි කියා 2004 දී අනුර කුමාරගේ නමින් 'ගරු අනුර කුමාර දිසානායක' යනුවෙන් සමරු ඵලක පිහිටුවා තිබීම, සහ ලයිට් රේල් දුම්රිය පිළිබඳ වසන්ත සමරසිංහ විසින් කළ අඳබාල ප්‍රකාශ.

තමන් ලැම්බෝගිනි ගැන කීවේ නැතැයි අනුර කුමාර දිවුරා පැවසීම, මාතර-බෙලිඅත්ත දුම්රිය මාර්ගය ඉදිකිරීමට එරෙහිව 'තියෙන පාරවල් හොඳටම ඇති' යැයි වසන්ත සමරසිංහ කියමින් සංවර්ධනයට බාධා කිරීම, සහ රනිල් වික්‍රමසිංහට එරෙහිව බටලන්ද කොමිෂන් වාර්තාවෙන් ක්‍රියාමාර්ග ගන්නා බවට වසරක් පුරා පම්පෝරි ගසා පසුව එය යටගසා දැමීම.

ප්‍රභූ ආරක්ෂාව මුළුමනින්ම ඉවත් කරන බවට ජනතාවට සහතික වී බලයට පත් වූ පසු උතුරු කොරියාවේ මෙන් වාහන දෙපස දුවන ආරක්ෂක භටයින් පිරිවරාගෙන ගමන් කිරීම, පන්සල්වල භික්ෂූන් ඉදිරියේ බිම වාඩි නොවී පුටුවල වාඩිවන අගමැතිනියගේ හැසිරීම, සහ 'ක්‍රිකට් විනාශ කළා' යැයි තමන්ම චෝදනා කළ පුද්ගලයින්ට නැවත ක්‍රිකට් පාලනය භාරදීම.

රට වටේ බෝට්ටුවලින් එළවළු සහ මාළු බෙදන බවට හාස්‍යජනක ප්‍රකාශ සිදුකිරීම, 'සහෝදරයා' යැයි කියාගත් මාලිමා මන්ත්‍රීවරුන් පාර්ලිමේන්තුවේදී 'සර්' යනුවෙන් ඇමතීමට පුරුදු වීම, වෙනත් පක්ෂ නිවාස ගනිද්දී 'වරප්‍රසාද' යැයි කී මාලිමාව තම නියෝජ්‍ය ඇමතිවරුන් 6 දෙනෙකුට කොළඹින් නිවාස ලබාදීම 'පහසුකම්' ලෙස සාධාරණීකරණය කිරීම සහ බ්‍රිතාන්‍යයෙන් යටත්විජිත වන්දි ඉල්ලීමේ විකාර ප්‍රකාශ.

උද්ධමනය හා ජීවන වියදම අහස උසට නැග තිබියදී එක් පුද්ගලයෙකුට මසකට රුපියල් 16,690ක් ප්‍රමාණවත් යැයි මුදල් නියෝජ්‍ය අමාත්‍යවරයා පැවසීම, ජවිපෙ පන්ති සටන් පාඩම්වල තිබූ ප්‍රතිපත්ති ප්‍රායෝගිකව ක්‍රියාත්මක කළ නොහැකි බව සුනිල් හඳුන්නෙත්ති විසින් ප්‍රසිද්ධියේ පිළිගැනීම සහ විදෙස්ගත ශ්‍රී ලාංකිකයන් හමුවේ තමන් ජීවත්වන්නේ අනුන්ගේ ආධාරවලින් යැයි කියමින් අනුකම්පාව ලබාගැනීමට දැරූ උත්සාහය.